අතුරු කමිටුව තේරු පුහුණුකාරිනිය නව පරිපාලනයෙන් ඉවත් කරයි
නෙට්බෝල් නිලවරණය නීති විරෝධී බවට පැමිණිල්ලක්
අතුරු කමිටුව තේරු පුහුණුකාරිනිය
නව පරිපාලනයෙන් ඉවත් කරයි
ප්‍රින්ස් ගුණසේකර
ශ්‍රී ලංකා නෙට්බෝල් සම්මේලනයේ නිලවරණය නීති විරෝධි බවට ක්‍රීඩා
අමාත්‍යාංශයට පැමිණිලි ලැබී ඇතැයි වාර්තා වේ. මෙවර නියෝජ්‍ය සභාපති තනතුරට
පත් යෙස්මින් ධර්මරත්න මහත්මිය මෙයට පෙර හයවතාවක් ලේකම් තනතුරට හා
එක්වතාවක් භාණ්ඩාගාරික තනතුරට පත්ව ඇති හෙයින් වසර හතරේ නීතිය අනුව මෙවර
පත්වීම නීති විරෝධී බවට ක්‍රීඩා අමාත්‍යාංශයට යොමු කළ පැමිණිල්ලේ දැක්වේ.
ජාතික ක්‍රීඩා සංගම් නියෝගවල ප්‍රකාරව සභාපති, ලේකම්, භාණ්ඩාගාරික, උප
සභාපති, සහකාර ලේකම් හා සහාකර භාණ්ඩාගාරික යන තනතුරුවල වසර 4ක් සිටි අයට
නැවැත එම තනතුරු දැරිය නොහැකිය යන්න සඳහන් වුවද නියෝජ්‍ය සභාපති පිළිබඳව
සටහන්වී නොමැත.
මේ හේතුවෙන් නියෝජ්‍ය සභාපති තනතුරට ධර්මරත්න මහත්මිය පත්වුවද ප්‍රධාන
තනතුරු වසර 4කට වඩා දරා තිබීම එම පත්වීම වලංගු නොවීමට හේතුවක් බව ලිපිය මගින්
පෙන්වා දී තිබේ.
යෙස්මින් ධර්මරත්න මහත්මිය 1993, 1994, 2004, 2005, 2006 යන වසරවල ලේකම්
තනතුරද 2011දී භාණ්ඩාගාරික තනතුරද දරා තිබේ.
මේ පිළිබඳව ක්‍රීඩා අමාත්‍යාංශයෙන් කළ විමසීමකදී එහි ජ්‍යෙෂ්ඨ
නිලධාරියෙකු පැවැසුවේ ක්‍රීඩා රෙගුලාසිවල නියෝජ්‍ය සභාපති තනතුර වෙනුවෙන්
ගතහැකි පියවර සඳහන් නොවන බවයි. එය ක්‍රීඩා රෙගුලාසි සැකසීමේදී සිදුවූ
අඩුපාඩුවක් විය හැකියැයිද එම ප්‍රකාශකයා පැවැසීය.
නියෝජ්‍ය සභාපති තනතුරට පත්වූ යෙස්මින් ධර්මරත්න මහත්මියට ක්‍රීඩා
අමාත්‍යාංශයේ අනුමැතියද හිමිව තිබේ. එබැවින් එම පත්වීම නිත්‍යානුකූල නොවන
බවට තර්කයක් මතු කිරීම ක්‍රීඩා රෙගුලාසි අනුව කළ හැකිද යන ගැටලුව මතුව ඇත.
ධර්මරත්න මහත්මිය පවසන්නේ තම පත්වීම ක්‍රීඩා රෙගුලාසි අනුව සිදුවු එකක් බවය.
මේ අතර නෙට්බෝල් අතුරු කමිටුව තෝරාදුන් ජාතික නෙට්බෝල් පුහුණුකාරිනිය
පිළිනොගැනීමට අලුතින් පත්වූ සම්මේලන නිලධාරීන් තීරණය කොට ඇතැයි වාර්තා වේ.
ඒ සඳහා ක්‍රීඩා අමාත්‍යාංශයේ අදහස විමසූ බවද අතුරු කමිටුවේ තෝරා ගැනීම
නීත්‍යානුකූලව සිදු නොවු බවට අමාත්‍යාංශයේ මතයවූ බවද නෙට්බෝල් විධායක කමිටු
සාමාජිකාවක් 'දිනමිණ'ට පැවැසුවාය.
නෙට්බෝල් පුහුණුකාරිනිය ලෙස සොමිතා ද අල්විස් හා සහාය පුහුණුකාරිනිය ලෙස
පී.ඩී.එන්.ප්‍රසාදී යන මහත්මීන් අතුරු කමිටුව තෝරා තිබුණි. එම තෝරා ගැනීමේ
පරීක්ෂණය ක්‍රීඩා විද්‍යායතනයේ අධ්‍යක්ෂ සජිත් ජයලාල් මහතාගේ හා ට්‍රික්සි
නානායක්කාර, කස්තුරි විල්සන් යන මහත්මීන්ගේ මෙහෙයවීම මත සිදුවිය.
එම තෝරා
ගැනීම සිදු කිරීමට අමාත්‍යාංශය නෙට්බෝල් අතුරු කමිටුවට බලය පවරා නොතිබීම
හේතුවෙන් මේ තීරණයක් ගත් බව විධායක කමිටු සාමාජිකාව පැවැසීය. නෙට්බෝල්
නිලධාරිනියන්ගේ හදිසි රැස්වීමක් ඊයේ පැවැති අතර එහිදී තීරණය වී ඇත්තේ
ප්‍රසිද්ධ දැන්වීමකින් නැවැත පුහුණුකාරිනිය තෝරා ගැනීමේ පරීක්ෂණ කඩිනමින්
සිදු කිරීමටය.
අතුරු කමිටුව පුහුණුකාරිනිය තෝරා ගැනීමේදී සම්මුඛ පරීක්ෂණයට සහභාගිවීමේ
අවස්ථාව ඉල්ලා සිටියද එයට ඉඩකඩ නොලැබුණු දීප්ති ද අල්විස් මහත්මිය එම තනතුරට
පත්කිරීමටද යෝජනාවී ඇතැයි පැවැසේ. ලෝක ශූරතා නෙට්බෝල් තරගාවලියට තවත් මාස
3ක් පමණ තිබියදී පුහුණුකාරිනිය තෝරා ගැනීමට ඇති කඹ ඇදිල්ල පිළිබඳ බොහෝ දෙනා
විමතිය පළ කරති.
| 
කර්තෘට ලියන්න
මුද්‍රණය සඳහා
