වැස්සෙන් පීඩාවට පත්වූවනට පිසූ ආහාර
සපයන්න ජනපති නියමයෙන් ලක්ෂ 180ක්
පුද්ගලයන් 2,77,000ක් අවතැන්, මරණ 10යි:
තිදෙනෙක් අතුරුදන්
මහවැසි හේතුවෙන්, බස්නාහිර පළාත ඇතුළුව රට පුරා පීඩාවට පත්ව සිටින ජනතාවට කඩිනමින්
සහන සලසන ලෙස ජනාධිපති මහින්ද රාජපක්ෂ මහතා ඊයේ උපදෙස් දුන්නේ ය.
මේ අනුව විපතට පත් ජනතාවට පිසු ආහාර ලබාදීම සඳහා රුපියල් ලක්ෂ 180 ක මුදලක් ලබාදීමට
ඊයේ (18) අරලිය ගහ මන්දිරයේ පැවති ආපදා කළමනාකරණ විශේෂ කමිටු රැස්වීමක දී රජය තීරණය
කළේය.
බස්නාහිර හා අනෙකුත් පළාත්වල මතුවී ඇති ගංවතුර තත්ත්වය පිළිබඳව අවධානය යොමු
කොට පීඩාවට පත් වී ඇති ජනතාවට කඩිනමින් අවශ්‍ය සහන සලසන ලෙසත්, ජලය ක්‍රමානුකූලව
බැසයාම සඳහා ආපදා කළමනාකරණ අමාත්‍යාංශය, පළාත් පාලන ආයතන, ප්‍රාදේශීය ලේකම්වරුන්
ඇතුළු රජයේ නිලධාරීන් එක්ව ඒකාබද්ධ වැඩපිළිවෙළක් කඩිනමින් ක්‍රියාත්මක කරන ලෙසත්
ජනාධිපතිතුමා උපදෙස් දුන්නේය.
විස්තර » |
වරාය හා ගුවන් සේවා ඇමැතිවරයා වශයෙන් සිටියදී තමාට හිමි වූ ඉන්ධන දීමනාවෙන් ඉතිරි
කැර ගත් රුපියල් 1,50,000ක මුදලක් එම අමාත්‍යාංශයට බාර දීමට කතානායක චමල් රාජපක්ෂ
මහතා පියවර ගෙන ඇත.
එම මුදල වරාය හා ගුවන්සේවා අමාත්‍යාංශයේ ලේකම් කේ.ටී.පී. රංජිත්
ද සිල්වා මහතා වෙත ඊයේ (18) බාර දී තිබේ. මැතිවරණ කාල සීමාවෙන් පසුවද ඇමැතිවරයෙකුට හිමි වූ ඉන්ධන දීමනාවෙන් මෙතරම් මුදලක්
ඉතිරි කැර ගැනීම අගය කළ යුතු බව අමාත්‍යාංශයේ ලේකම්වරයා “දිනමිණ” ට පැවැසීය. 
එක්සත් ජාතික පක්ෂයේ ප්‍රතිසංවිධාන යෝජනා අද (19) දා විපක්ෂනායක රනිල් වික්‍රමසිංහ
මහතාට භාර දෙන බව ප්‍රතිසංවිධාන කමිටුව පවසයි.
පක්ෂ නායකයාට භාර දීමෙන් අනතුරුව අනිද්දා (21) දා උදෙ පැවැත්වෙන එක්සත් ජාතික
පක්ෂයේ පාර්ලිමේන්තු මන්ත්‍රීවරුන්ගේ හා කෘත්‍යාධිකාරී මණ්ඩල සාමාජිකයන්ගේ විශේෂ
හමුවකදී එය එළි දක්වන බව ප්‍රතිසංවිධාන පිළිබඳ සොයා බැලීමට පත් කළ කමිටුවේ සභාපති
ජෝෂප් මයිකල් පෙරේරා මහතා “දිනමිණට” ප්‍රකාශ කෙළේය. 
