|
|||||||||||||||||||||||||||||||||||||
රටවල් 71කින් ශ්‍රී ලංකාවට 20 වැනි තැන පොදු රාජ්‍ය මණ්ඩලීය ක්‍රීඩා උළලේදී රටවල් 71 ක් අතුරින් ශ්‍රී ලංකාව 20 වැනි ස්ථානයට පත්විය. ශ්‍රී ලංකාවට රන් පදක්කම් 1 ක්, රිදී පදක්කම් 1 ක් හා ලෝකඩ පදක්කම් 1 ක් හිමිවිය. රන් පදක්කම බොක්සිං ක්‍රීඩක මංජු වන්නිආරච්චි, රිදී හා ලෝකඩ පදක්කම් ශ්‍රී ලංකා කණ්ඩායමේ නායක චිංතන ගීතාල් විදානගේ, සුදේෂ් පීරිස් බර ඉසිලීමෙන් දිනා ගත්හ. මේ තරගාවලියේ ප්‍රථම ස්ථානය ඔස්ට්‍රේලියාව (රන් 74, රිදී 55, ලෝකඩ 48) දිනාගත් අතර සත්කාරක ඉන්දියාව (රන් 38, රිදී 27, ලෝකඩ 36) දෙවැනි තැනට පත්විය. ඉන්දියා පදක්කම් 101 ක් දිනා ගැනීම කැපී පෙනුණි. තරගාවලිය ආරම්භයේදීම ඉන්දියාව පදක්කම් 100 ක් දිනාගන්නා බවට බලාපොරොත්තු පළකරමින් කළ අනාවැකිය තහවුරු කිරීමද සැලකිය යුතු කරුණකි. ඉන්දියාව 2006 මෙල්බෝන් තරගාවලියේදී සිවුවැනි තැන සිටි අතර මෙවර එංගලන්තය හා කැනඩාව පසු කිරීමට සමත්වීම ඉන්දීය ක්‍රීඩාවේ සැලසුම් සහගත ජයග්‍රහණයකි. ශ්‍රී ලංකාව 2006 දී 22 වැනි ස්ථානයේ සිට මෙවර 20 වැනි ස්ථානයට පත්විය. ශ්‍රී ලංකාවට 2006 දී හිමිවූයේ බර ඉසිලීමෙන් රන් පදක්කම පමණි. මෙවර පදක්කම් 3 ක් සේම ශ්‍රී ලංකා වාර්තා කිහිපයක් ශ්‍රී ලංකාවෙන් බිහිවිය. මීටර් 1500 තරගයේදී චමින්ද විජේකෝන් (වි. 3:40:78) මීටර් 200 නිදහස් ආර තරගයේ දී මැතිව් අබේසිංහ (වි. 1:56:23), මීටර් 100 පසුපස ආර තරගයේ දී හේෂාන් උනම්බුව (තත්. 59.35), නව ශ්‍රී ලංකා වාර්තා බිහිකළහ. බර ඉසිලීමේදී කිලෝග්‍රෑම් 56 බර පන්තියෙන් කමල් බණ්ඩාර කිලෝග්‍රෑම් 233 ක් එසැවීම හා කිලෝ ග්‍රෑම් 62 බර පන්තියෙන් සුදේශ් පීරිස් කිලෝග්‍රෑම් 272 ක් එසැවීමද නව ශ්‍රී ලංකා වාර්තා වූහ. ශ්‍රී ලංකා මලල ක්‍රීඩක ක්‍රීඩිකාවන් කිහිපදෙනෙකු මේ තරග වාරයේ හොඳම කාලය වාර්තා කිරීමට සමත්වූහ. ශ්‍රී ලංකාව පොදු රාජ්‍ය මණ්ඩලයට අයත් ආසියානු රටවලින් 5 වැනි ස්ථානයටත් දකුණු ආසියාවෙන් 3 වැනි ස්ථානයටත් පත්ව සිටී. ශ්‍රී ලංකා ක්‍රීඩක ක්‍රීඩිකාවෝ අද පෙරවරු 10.20 ට කටුනායක බණ්ඩාරනායක ගුවන්තොටුපොළින් මවුබිමට ළඟාවීමට නියමිතය.
.
|
|
| |
||||||||||||||||||||||||||||||||||
|
කර්තෘට ලියන්න
මුද්‍රණය සඳහා
