|
|||||||||||||||||||||||||||||||||||
දේශපාලනය කියන්නේ ජනතාව ඒකරාශී කිරීම මිසක් ජනතාව වෙන්කිරීම නෙවෙයි. ශ‍්‍රී ලංකාව පෝසත් වන්නේ නැත්තේ ඇයි ? මේ රට ශක්තිමත් රටක් බවට පත් කළ හැකි රටක්. මම දේශපාලනය කරන්න ආවේ අත්දැකීම් සමූහයක් අරගෙන. දේශපාලනයෙන් නෙමෙයි අත්දැකීම් ගත්තේ දේශපාලනයට බාහිරවයි. ඒ අනුවයි එදා මම එජාපයේ දී නිකවැරටිය ආසනය නියෝජනය කළේ. එතැනත් එදා මම දේශපාලනය කෙළේ පක්ෂ අනුව නෙමෙයි රට වෙනුවෙන්. ජනතාව වෙනුවෙන්. පසුගිය ඡන්දයේදී නිකවැරටිය ආසනයේ ජනතාව 77% ක් මා සමඟ සිටියේ ඒ අනුව. මම පාර්ලිමේන්තුවේ හැමවිටම කතා කෙළේ ජාතික එකඟතාවක් සඳහා. 2004 වර්ෂයේ දී මම එජාපයේ සිට සන්ධාන ආණ්ඩුවට සම්බන්ධ වුණේ ඒ ජාතික එකඟතාවයේ අරමුණ අනුව. එජාපය එදා එයට සම්බන්ධ විය යුතුව තිබුණත් ඔවුන් එයට සම්බන්ධ වුණේ නෑ. මම දේශපාලන වශයෙන් අනාථ වෙන්න පුළුවන් කියා එදා සමහරු කීවා. මම ඒ වෙලාවේ කිව්වේ ආත්ම විශ්වාසය තමයි දේශපාලනය කරනකොට තිබිය යුතු හොඳම ආයුධය කියා. මම ආණ්ඩුවට එනකොට චන්ද්‍රිකා ජනාධිපතිනිය කීවා මා සමඟ ගිවිසුමක් අස්සන් කළ යුතුයි කියා. මොකද මම මෙතැන හිටියේ නැත්නම් කවුද ඔබ පැමිණි වගකීම දරන්නේ කියා. එතකොට මම ජනාධිපතිනියට කීවා. “මැඩම් මම ගිවිසුම්වලට දේශපාලනය කරන්නේ නෑ. මම දේශපාලනය කරන්නේ මගේ නිදහස් මතයට. ඒ අනුව මට ආත්ම ශක්තියක් තියෙනවා, හැකියාවක් තිබෙනවා. ඒ දේ ගැන මට විශ්වාසයි” කියා. මොකද නායකත්වයේ චන්ද්‍රිකා මැතිනිය හිටියත් මහින්ද රාජපක්ෂ ජනාධිපතිතුමා හිටියත් දේශපාලනය කරන පුද්ගලයා දැනගන්න ඕන තමුන්ගේ දේශපාලනය කොහොමද හසුරුවා ගන්නේ කියා. නායකයා සමඟ වැඩ කරන්න තමන් නිහතමානී වෙන්න ඕන. නායකත්වය පිළිගන්න ඕන. ඒ අනුව රටේ වගකීම ඉෂ්ට කරන්න තමන් දැනගන්න ඕන. අන්න ඒ දේශපාලන න්‍යායයේයි මම කටයුතු කෙළේ. 2005 දී ජනාධිපති මහින්ද රාජපක්ෂ මහතාව ජයග‍්‍රහණය කරවන්න කැපවුණු සුළු පිරිසේ එක් අයෙකු වීම ගැන මම අද අසීමිත සතුටු වෙනවා. මම අදත්, මගේ බිරිය දීප්ති බෝගොල්ලාගමත් ජනාධිපතිතුමා වෙනුවෙන් කරන්න පුළුවන් උපරිම වගකීම් කොටස ඉටුකරන්න ඇප කැප වෙලා ඉන්නේ. * පාසල් යන කාලේ ඔබේ සිතේ යම් බලාපොරොත්තුවක් තිබුණද කිසියම්ම දවසක දේශපාලනඥයකු වෙනවා කියා ? මට ඉස්සෙල්ලාම අවශ්‍යය වුණේ නීතිඥයකු ලෙස හොඳ ස්වාධීනත්වයක් ඇතිකර ගන්න. මේ සඳහා මට විශාල ශක්තියක් වුණා මගේ භාර්යාවගේ පියා ඩයස් සමරකෝන් මැතිතුමා. ඔහු සිවිල් සේවයේ හිටපු නිලධාරිවරයෙක්. නීතිඥවරයෙක්. මගේ භාර්යාව වෙනුවෙන් විශාල කැපවීමක් කළා. විශේෂයෙන් කොළඹ තලයේ මට ඉදිරියට එන්න ශක්තියක් වුණා. ඒ අනුව ඉදිරියේදී මම දේශපාලනයට ආවොත් රටේ වගකීමක් දරන්න පුළුවන් කටයුත්තක් කරන්න පුළුවන් කියන සිතුවිල්ල මා කෙරෙහි තිබුණා. * ඔබේ ජීවිතයේ සෙවණැල්ල බඳු ඔබේ බිරිය (දීප්ති බෝගොල්ලාගම) ඔබට හමුවන්නේ කොහොමද? ඇය මට හමුවන්නේ නීති විද්‍යාලයේදීයි. ඒ වෙනකොට ඇය දීප්ති සමරකෝන්. ඇය විශාඛා විද්‍යාලයේ ඉගෙනගෙන නීති විද්‍යාලයට ආවා. මම ආනන්ද විද්‍යාලයේ ඉගෙන ගෙන නීති විද්‍යාලයට ආවා. මම ඇයට වඩා එක අවුරුද්දක් ජ්‍යෙෂ්ඨයි.
ඇය නීති විද්‍යාලයේ හිටියේ අපේ මහින්ද රාජපක්ෂ ජනාධිපතිතුමාගේ පන්තියේ. එතුමා නීති විද්‍යාලයට ආවේ 1974 අවුරුද්දේ. අපි එකට ආශ‍්‍රය කළා. එතුමිය ජනාධිපතිතුමාව දන්නවා කුඩා කාලයේ සිට. ඒ ගෙදර ආශ‍්‍රයෙන්. දීප්තිත් මමත් කලක් ආශ‍්‍රය කර සිත් හොඳින් දැන ගත්තාට පසු 1977 වර්ෂයේ සැප්තැම්බර් මාසේ 5 වැනිදා විවාහ වුණා. ඒ අනුව අපට මේ වනවිට දරුවන් දෙදෙනෙක් ඉන්නවා. දුවයි පුතයි. මගේ පුතා දක්ෂිණ බෝගොල්ලාගම අමෙරිකාවේ අධ්‍යාපනය ලබා දැන් ඔහුගේ අවසන් අධ්‍යාපන කටයුතු සිංගප්පූරුවේ කරනවා. දුව දිල්ෂානී බෝගොල්ලාගම, එංගලන්තයේ ඉගෙනුම ලැබුවා. දැන් ඉන්දියාවේ ප‍්‍රධානම වෛද්‍ය විද්‍යාලයෙන් සිවුවන වසරේ අධ්‍යාපනය ලබනවා. * ඔබේ බිරියගෙන් ඔබේ දේශපාලන දිවියට ලැබෙන අනුග‍්‍රහය ? ආසන මට්ටමේ දේශපාලන සංවිධානයට ඇයට හොඳ හැකියාවක් තිබෙනවා. ඒ වගේම මගේ දේශපාලන දිවියට සැබැවින්ම ඇය ශක්තියක්. * නිකවැරටිය වැනි ග‍්‍රාමීය ආසනයක සංවිධායකවරයෙක් වූ ඔබ අද කෝට්ටේ වැනි නාගරික ප‍්‍රදේශයක ආසන සංවිධායකවරයෙක්. මේ පළාත් දෙකේ ජනතාවගේ අවශ්‍යතා වෙනස්. එය ඔබ තේරුම්ගෙන ඇති ආකාරය? ගම සහ නගරයේ ජීවත්වන ජනතාවගේ ඇත්තේ විශාල වෙනසක්. නිකවැරටිය කියන්නේ කොළඹ දිස්ති‍්‍රක්කය හා සමාන භූමි ප‍්‍රමාණයක් තියෙන විශාල ආසනයක්. කෝට්ටේ ආසනයේ ප‍්‍රමාණය වර්ග කිලෝමීටර් 17 1/2 යි. ජනගහණයෙන් දෙකම එකයි. නිකවැරටියේ තියෙන්නේ ග‍්‍රාමීය ජනතාවගේ බලාපොරොත්තු. ගොවිතැන, ගමට විදුලිය, වතුර, ගොවි නිෂ්පාදනවලට හොඳ මිලක්. ගමේ ඉඳලා නගරයට එනන බස් එකක්. ඔවුනට ඇත්තේ පොදු ප‍්‍රශ්න සහ අපේක්ෂා. කෝට්ටේ ජනතාවට වතුර තියෙනවා, ලයිට් තියෙනවා, හුඟක් අයට නිවාස තිබෙනවා. එහෙත් පරිසරාත්මක ප‍්‍රශ්න හුඟක් තියෙනවා. වැසි වතුර බැසයාමේ ප‍්‍රශ්න, කුණු ප‍්‍රශ්න, ජල ගැලීම් ප‍්‍රශ්න, නිසිපරිදි අපවිත‍්‍ර ද්‍රව්‍ය ඉවත් නොකිරීමේ ප‍්‍රශ්න, සහ රැකියා අවශ්‍යතා ඔවුනට තිබෙනවා. මෙතනදී නාගරික ජනතාවගේ ප‍්‍රශ්න සඳහා මුහුණදීම ටිකක් ලේසියි. ආයෝජනය අඩුයි. ගමේ ආයෝජනය වැඩියි. දුර ප‍්‍රමාණය අනුව.
* ඉදිරි මහ මැතිවරණයේ දී ඔබට කෝට්ටේ ආසනයේ සංවිධායකවරයා ලෙස කොළඹ දිස්ති‍්‍රක්කයට තරග කරන්න වෙනවා. ඒ ගැන මොකද කියන්නේ ? කෝට්ටේ ආසනය මම බාරගත් පසු පැවැති පළාත් සභා මැතිවරණයේදී වැඩි ඡන්ද 12,500 කින් ඉතිහාසයේ පළමු වතාවට කෝට්ටේ සන්ධානය දිනාගත්තා. කලින් එහෙම වැඩි ඡන්ද ගණනකින් දිනාගෙන නෑ. කෝට්ටේ කිව්වහම සමහරු හිතනවා ඒක එජාපයේ අලි බලකොටුව කියා. සිරිකොතත් තියෙන්නේ කෝට්ටේ ආසනයෙනේ. පසුගිය ඡන්දයේ ඒ මතය මම බින්දා. ඉදිරියේදී කෝට්ටේ දිගටම සන්ධානයේ බලකොටුවක් වේවි. මම කියන්නේ කෝට්ටේ ජනතාවට මා සමඟ එකතු වන්න කියා. එය එජාපයේ අයටත් මම කියනවා. පක්ෂයට වඩා අපට අපේ රට වටිනවා. ජනාධිපතිතුමා අපට ලබා දී ඇති නිදහස අර්ථවත් කළ හැක්කේ සියලුම දෙනා එකට එකතුවී ගමනක් යාමෙන්. * ඔබ කැමැතිම ශ‍්‍රී ලංකාවේ සිටිය විදේශ ඇමැතිවරයා කවුද? විදේශ ඇමැති ධූරයේ ඇති වගකීම සහ යුතුකම දර්ශනය සැබෑ ලෙස ඉෂ්ට කළ විදේශ ඇමැතිවරිය ලෙස මම සඳහන් කරන්නේ හිටපු අගමැතිනි සිරිමාවෝ බණ්ඩාරනායක මැතිනියයි. ඇය එදා අනුගමනය කළ පිළිවෙත් අද විදේශ ඇමැතිවරයා ලෙස කටයුතු කරන මටද විශාල ශක්තියක් වී තිබෙනවා. ඒ අනුව ලෝකයේ වැඩිම රටවල් ප‍්‍රමාණයක් ශ‍්‍රී ලංකාව හා සම්බන්ධ වී කටයුතු කෙළේ මහින්ද රාජපක්ෂ ජනාධිපතිතුමාගේ නායකත්වය යටතේ මා විදේශ ඇමැති ධූරය දැරූ පසුගිය වසර දෙකේදීයි. * ඔබේ ලග්නය මොකක්ද? කුම්භ ලග්නය. * නක්‍ෂත‍්‍රය පිළිබඳව ඔබට ඇති මතය කුමක්ද? ඔබතුමාට අනාවැකියක් කියන්න පුළුවන්නම් මම අහගෙන ඉන්නම්. (සිනාසී) නක්‍ෂත‍්‍රය කියන්නේ විද්‍යාවක්. විද්‍යාවක් අනුව යම් තක්සේරුවක් කරන්න පුළුවන් නම් ඒක හොඳයි. ඒ ආශ‍්‍රයෙන් නිවැරැදිව යම් දෙයක් කියන්න පුළුවන් නම් එහි වැරැද්දක් නෑ. * ඔබේ සිත්ගත් දේශපාලනඥයා කවුද? ශ‍්‍රී ලංකාවේ සිටි සියලුම දේශපාලන නායකයන්ගේ සුවිශේෂ වූ විවිධ ගති ලක්ෂණ තිබෙනවා. * ඒ අතර වර්තමාන ජනාධිපතිතුමාට ඇති සුවිශේෂ ගති ලක්ෂණය කුමක්ද? අපේ ජනාධිපතිතුමා ඉතාමත් අධිෂ්ඨාන පූර්වක නායකයෙක්. අධිෂ්ඨානයක් කරගත්තොත් මහින්ද රාජපක්ෂ ජනාධිපතිතුමා ඒ දේ ඉෂ්ට කරනවා. මේ ඉලක්කයට රට ගෙනියන්න පුළුවන් කියන අරමුණ එතුමාට තිබෙනවා. මානුෂීය මෙහෙයුම අපට ජයගන්න පුළුවන් කියන අදිටන එතුමාට තිබුණා. ඒක එතුමා ජයගත්තා. රට සංවර්ධනයේ ඉලක්කයට ගෙනියන්න පුළුවන් කියන අධිෂ්ඨානය එතුමාට තිබෙනවා. ඒ තැනට එතුමා රට අරන් යනවා. * අපේ රට අනෙකුත් දියුණු විදේශ රටවල තත්ත්වයට අපට ගෙනයන්න පුළුවන් කියන විශ්වාසය විදේශ ඇමැතිවරයා ලෙස ඔබට තිබෙනවද? ඒකට ඕන රටේ සියලුම දෙනාගේ අධිෂ්ඨානය පමණයි.
|
| |
|||||||||||||||||||||||||||||||||
|
මගේ සම්පූර්ණ නම චන්ද්‍රසේකර රෝහිත බණ්ඩාර බෝගොල්ලාගම.
කර්තෘට ලියන්න
මුද්‍රණය සඳහා
