|
|||||||||||||||||||||||||||||||||||||||
මහින්ද රාජපක්ෂ වත්මන් ජනාධිපතිවරයාගේ පියා වන ඩී. ඒ. රාජපක්ෂ මහතාගේ 104 වැනි ජන්ම දිනය යෙදී තිබුණේ පසුගිය 30 වැනිදාටය. එම නිසා රාජපක්ෂ පරපුරේ ඉතිහාසයෙන් කතාව ආරම්භ කිරීම වඩාත් සුදුසු ය. මහින්ද රාජපක්ෂ ජනාධිපතිවරයා ඇතුළු ඔහුගේ සහෝදරයන් වර්තමානයේදී මේ රට ත‍්‍රස්තවාදයෙන් මුළුමනින්ම බේරාගෙන රටේ සංවර්ධනය ඉහළ නැංවීමට ගෙන යන වැඩපිළිවෙළ හා එහිදී පැමිණෙන බාධක ජයගැනීමට රාජපක්ෂවරුන් උපක‍්‍රමශීලීව ගන්නා කි‍්‍රයා මාර්ග මේ රටේ අති බහුතරයක් ජනතාව හොඳින් දන්නා අතර ඒ සඳහා එම ජනතාවගේ ආශිර්වාද ලැබී තිබෙන බව පසුගිය මැතිවරණ ප‍්‍රතිඵලවලින් ඉතා හොඳින් පෙන්නුම් කෙරේ. එම නිසා වත්මන් රාජපක්ෂ පරපුර රට වෙනුවෙන් කරනු ලබන සේවාවන් ඉතා හොඳින් දැකගැනීමට හැකි නිසා රාජපක්ෂ පරපුරේ අතීතය එනම් වත්මන් රාජපක්ෂ පරපුරට රට බේරාගැනීමට මේ ශක්තිය ආශිර්වාදය ලැබුණේ කෙසේද කියා දැනගැනීම කාලෝචිත මෙන්ම ඉතාමත්ම වැදගත්ය.
රුහුණේ සිංහයා යන විරුදාවලියෙන් අමතා එදා රුහුණේ ජනතාව අසීමිත ලෙස ආදරය කෙළේ වීරකැටියේ බුජ්ජම්පොළ ඩී. එම්. රාජපක්ෂ මහතාටය. රාජපක්ෂ පරපුරේ දේශපාලනයේ ප‍්‍රමුඛයා ඩී. එම්. රාජපක්ෂ මහතා බව කීවොත් එය අසත්‍යයක් නොවේ. ගාල්ලේ රිච්මන්ඩ් විද්‍යාලයේ දීප්තිමත් ආදි ශිෂ්‍යයකු මෙන්ම දක්ෂ කී‍්‍රඩකයකු ද වූ ඩී. එම්. රාජපක්ෂ මහතා වසර කිහිපයක්ම පාසලේ කි‍්‍රකට් කණ්ඩායමේ නායකත්වය දැරීය. අධ්‍යාපන කටයුතුවලින් අනතුරුව උසස් රැකියාවකට ගොස් සුඛෝපභෝගී ජීවිතයක් ගත කිරීමට ලැබී තිබුණ අවස්ථාව අතහැර දැමීමට ඩී. එම්. රාජපක්ෂ මහතා තීරණය කෙළේ හිතේ තිබුණු නැවුම් ඒවගේම විශාල බලාපොරොත්තුවක් හේතුවෙනි. දිළිඳුකමෙන් පීඩා විඳි ජනතාව වෙනුවෙන් යම් වැඩකොටසක් අනිවාර්යෙන්ම කිරීමට ඩී. එම්. රාජපක්ෂ මහතා දැඩිව අධිෂ්ඨාන කර ගත්තේ ය. ඒ වගේම රුහුණේ ගිරුවාපත්තුවේ ජනතාවගේ ජීවන තත්ත්වය ඉහළ නැංවීමට ද ඩී. එම්. රාජපක්ෂ මහතාගේ විශාල බලාපොරොත්තුවක් තිබුණේ ය. මේ අනුව 1936 රාජ්‍ය මන්ත‍්‍රණ සභාවේ මැතිවරණයට ඉදිරිපත් වූයේ ස්වාධින අපේක්‍ෂකයකු වශයෙනි. ඒ කාලයේදී ඡන්දය භාවිතා කෙළේ වර්තමානයේදී වාගේ දේශපාලන පක්ෂ ලාංඡනයට නොවේ. ඒ කාලයේදී ඡන්දය භාවිතා කෙළේ අපේක්‍ෂකයාගේ වර්ණයට අදාළ ඡන්ද පෙට්ටියටයි. ඩී. එම්. රාජපක්ෂ මහතා තෝරාගෙන තිබුණේතම ප‍්‍රදේශවාසීන්ගේ ප‍්‍රධාන කෘෂි බෝගයක් වූ කුරහන් කරලේ පැහැයයි. එදා ඉඳන් වර්තමානය දක්වා රාජපක්‍ෂවරුන්ගේ අනන්‍යතාව පෙන්නුම් කෙරෙන ප‍්‍රධානතම සාධකයක් වුයේ කුරහන් පැහැති සාටකයයි. ඒ වන විට රුහුණේ ජනපි‍්‍රයතම දේශපාලනඥයා බවට පත්ව සිටියේ ඩී. එම්. රාජපක්ෂ මහතාය. ඔහුගේ ජය නිසැක බව දැනගත් ඇතැම් ප‍්‍රතිවාදී කුමන්ත‍්‍රණකරුවන් විවිධ කුමන්ත‍්‍රණ සිදු කොට ඩී. එම්. රාජපක්ෂ මහතා සිරගත කරන ලද්දේ කෙසේ හෝ ඡන්දයෙන් පරාජය කිරීමටයි. අසත්‍ය චෝදනා එල්ල කොට ඩී. එම්. රාජපක්ෂ මහතා සිරභාරයට පත්කර ඇති බව දැනගත් ජනතාව මැතිවරණ දිනයේ වැල නොකැඩී ගොස් ඡන්දය ප‍්‍රකාශය කෙළේ ඩී. එම්. රාජපක්ෂ මහතාටය. ඡන්ද ප‍්‍රතිඵල නිකුත් වන විට ප‍්‍රතිවාදී කුමන්ත‍්‍රණකරුවන්ට තරු පෙනෙන්න පටන් ගත්තේ සිරගෙදර සිටියදීම වැඩි ඡන්ද දොළොස් දහසකින් හම්බන්තොට මන්තී‍්‍රවරයා වශයෙන් ඩී. එම්. රාජපක්ෂ මහතා ජනතාව රාජ්‍ය මන්ත‍්‍රණ සභාවට තෝරා පත්කරගෙන තිබූ නිසාය. දිළිඳු ජනතාවගේ ජීවන තත්ත්වය නැංවීමට කි‍්‍රයා කරන ගමන්ම දේශීය කෘෂි කර්මාන්තය නඟා සිටුවීමට ද ඩී. එම්. රාජපක්ෂ මහතා නොගත් උත්සාහයක් නැත. ඩී. එම්. රාජපක්ෂ මහතාගේ සුවිශේෂීත්වයක් වූයේ රාජ්‍ය බලයට හෝ ප‍්‍රභූ බලයට බිය නොවී ජනතාව වෙනුවෙන් සේවය කිරීමයි. ඒ වගේම ඒ කාලයේ රට පාලනය කළ බි‍්‍රතාන්‍ය රජයේ උසස් නිලධාරීන් සමඟ ගැටීමටද ඩී.එම්.රාජපක්ෂ මහතා පසුබට නොවී ය. වරක් හම්බන්තොට කච්චේරියම උණුසුම් මුහුණුවරක් ගත්තේ සුදු ජාතික දිසාපතිවරයා සමඟ පැවැති සාකච්ඡාවකදී ඩී.එම්.රාජපක්ෂ මහතා නොබියව ජනතාව වෙනුවෙන් අදහස් ප‍්‍රකාශ කිරීම නිසා ය. ප‍්‍රදේශවාසීන් සම්බන්ධයෙන් පැවැති ප‍්‍රශ්නයක් සාකච්ඡා කිරීමට ගොස් කතාව දුරදිග ගියේ ය.
සුදු දිසාපතිවරයා කතාව කෙතරම් දුරදිග ගියේද කියතොත් ඩී.එම්. රාජපක්ෂ මහතා තම බස්තම ඔසවාගෙන ඉදිරියට පැන්නේ සුදු ජාතික දිසාපතිවරයාට පහරදීමට ය. අවට සිටි නිලධාරීන් ඉතා අසීරුවෙන් වළකා නොගත්තේ නම් එදා සුදු ජාතික දිසාපතිවරයාට සිදුවන්නේ ඩී.එම්.රාජපක්ෂ මහතාගෙන් හොඳ හැටි බස්තම් පාරවල් කන්නටය. මේ සිද්ධිය වසර ගණනාවක් යනතුරු දකුණේ ජනතාව සිහි කරන්නේ මහත් වූ අභිමානයකින් යුක්තව යි. තවත් අවස්ථාවකදී රාජ්‍ය මන්ත‍්‍රණ සභාවේ මහ ලේකම් ලෙස කටයුතු කළ සර් ග්‍රෙහාම් ටිරල්ගේ අපහාසාත්මක ප‍්‍රකාශයකට එරෙහි වීමට ද ඩී.එම්.රාජපක්ෂ මහතා පසුබට නොවී ය. ටිරල්ගේ ප‍්‍රකාශයට එරෙහිව ඔහුට සෙරෙප්පුවෙන් මුහුණට ගැසීමට ද ඩී.එම්.රාජපක්ෂ මහතා උත්සාහ දැරූ බව නොරහසකි. සුද්දන්ගේ ආණ්ඩුව කාලෙදි මෙවැනි නිර්භීත ආකාරයෙන් කි‍්‍රයා කිරීමට හැකියාව පවතින්නේ සැබෑ දේශපේර්මියකුටම පමණි. එපමණක් නොව එස්.ඩබ්ලිව්.ආර්.ඩී.බණ්ඩාරනායක, ආචාර්ය ඇන්.ඇම්.පෙරේරා, පිලිප් ගුණවර්ධන වැනි ප‍්‍රගතිශීලි නායකයන් සමඟ උරෙනුර ගැටී දුගී දුප්පත් ජනතාව වෙනුවෙන් හා ශී‍්‍ර ලංකාවට නිදහස දිනාගැනීමේ සටන් වෙනුවෙන් ඩී.එම්. රාජපක්ෂ මහතා ද සුවිශේෂි වැඩ කොටසක් කෙළේ ය. ශී‍්‍ර ලංකාවට නිදහස දිනාගැනීම සඳහා මැතිසබයෙත් ඉන් පිටතටත් ඩී.එම්.රාජපක්ෂ මහතා කරන ලද සුවිශේෂී කාර්ය භාරය පහසුවෙන් බැහැර කළ නොහැකි ය.
දැඩි කැපවීමක් ජනතා සේවය සඳහා ඩී.එම්.රාජපක්ෂ මහතාට කාලයක් නොවී ය. ජනතා සේවය නිසාම ඒ වෙනුවෙන් දැඩි කැපවීමක් දැක්වුව නිසා ඒ මහතා අසනීප තත්ත්වයන් ද එතරම් ගණන් නොගත්තේ ය. එක්වරක් රෝගී වූ ඩී.එම්. රාජපක්ෂ මහතා රෝගී තත්ත්වයද නොතකා ජනතා සේවය වෙනුවෙන්ම පෙනී සිටියේ ය. 1945 මැයි මස 18 වැනි දින ඩී.එම්. රාජපක්ෂ මහතා අභාවප‍්‍රාප්ත වුයේ ද සභා රැස්වීම සඳහා පැමිණ සිටියදී මැති සබයේදීම ය. තම අවසන් හුස්ම පොද වාතලයට නික්ම යන තෙක්ම ජනතාව වෙනුවෙන් හඬ නැගූ නිසා ජනතාව ඩී.එම්.රාජපක්ෂ මහතා හැඳින්වූයේ ‘ රුහුණේ සිංහයා’ වශයෙනි. ඩී.එම්.රාජපක්ෂ මහතාගේ අභාවයෙන් පසුව බාල සොයුරු ඩී.ඒ.රාජපක්ෂ මහතාත් පුතණුවන් වන ලක්ෂ්මන් හා ජෝර්ජ් රාජපක්ෂ යන මහත්වරු ද කි‍්‍රයාකාරී දේශපාලනයට පිවිසියහ. 1905 මාර්තු 30 වැනි දින රුහුණේ ගිරුවාපත්තුවේ දී මෙලොව එළිය දුටු ඩී.ඒ.රාජපක්ෂ මහතා ප‍්‍රගතිශීලී කි‍්‍රයාකාරිත්වයෙන් පුළුල් පුරෝගාමී මෙහෙයක් ඉටුකළ නායකයෙකි. ඩී.ඒ.රාජපක්ෂ මහතා සිය වැඩිමහල් සොහොයුරු වන ඩී.එම්.රාජපක්ෂ මහතාගේ මැතිවරණ ව්‍යාපාරය දිනවීමට තිරයේ පිටුපස සිට අතිවිශාල වැඩකොටසක් කරන ලදී. වත්මන් ජනාධිපති මහින්ද රාජපක්ෂ මහතා දිනවීමට චමල් රාජපක්ෂ, බැසිල් රාජපක්ෂ, ගෝඨාභය රාජපක්ෂ මහත්වරුන් විශාල වැඩකොටසක් තිරය පිටුපස සිට සිදු කෙළේ ඩී.එම්.රාජපක්ෂ, ඩී.ඒ.රාජපක්ෂ මහත්වරුන් අතර තිබුණු සබඳතාව සිහි ගන්වමිණි. 1945 වසරේදී ‘රුහුණේ සිංහයා’ හෙවත් ඩී.එම්.රාජපක්ෂ මහතාගේ අභාවයෙන් පසුව ගිරුවා ගම් දොළොස් දහසේ ජනතාවගේ නායකත්වය ගැනීම භාරවූයේ ඩී.ඒ.රාජපක්ෂ මහතාට ය. රාජ්‍ය මන්ත‍්‍රණ සභාවට හම්බන්තොට අතුරු මැතිවරණය සඳහා ඩී.ඒ.රාජපපක්ෂ මහතා නාම යෝජනා අස්සන් කෙළේ කුඹුරේ සීසාමින් සිටියදී ය. රාජපක්ෂවරුන් කෙතරම් රුහුණේ ජනතාව අතර ජනපි‍්‍රයත්වයට පත්ව සිටියේද කියනවා නම් ඩී.ඒ.රාජපක්ෂ මහතා සමඟ තරග කිරීමට කිසිවකු ඉදිරිපත් නොවීය. ඒ අනුව 1945 ජූලි 14 වැනි දින ඩී.ඒ.රාජපක්ෂ මහතා රාජ්‍ය මන්ත‍්‍රණ සභාවට තේරී පත්වන්නේ නිතරගයෙනි. අනතුරුව 1947 පැවති ප‍්‍රථම පාර්ලිමේන්තු මහ මැතිවරණය සඳහා එක්සත් ජාතික පක්ෂයෙන් තරගවදින ඩී.ඒ.රාජපක්ෂ මහතා බෙලිඅත්තේ මන්තී‍්‍රවරයා ලෙස පාර්ලිමේන්තුවට තේරීපත් වේ. තම ප‍්‍රගතිශීලී මතවාදය ඒ ආකාරයෙන්ම ආරක්ෂා කර ගනිමින් ජාතික නිදහස ලබාගැනීමට දායකත්වය ලබාදීම සඳහා එම පක්ෂයට සම්බන්ධ වූ බව ඩී.ඒ.රාජපක්ෂ මහතා පසුව ප‍්‍රකාශ කර තිබිණි. ශී‍්‍ර ලංකා නිදහස් පක්ිෂය බිහිවීමේ ඓතිහාසික අවස්ථාවේදී එස්.ඩබ්ලිව්.ආර්.ඩී.බණ්ඩාරනායක මහතාගේ ළඟින්ම සිටි හිතවතා වන්නේ ද ඩී.ඒ. රාජපක්ෂ මහතා ය. වර්තමානයේ ශී‍්‍ර ලංකා නිදහස් පක්ෂය ගැන විවිධ කතා කියන ඇතැම් කුමන්ත‍්‍රණකරුවන්ට මේ ඉතිහාස පාඩම යළි ඉගැන්විය යුතුමය. 1951 වසරේදී එස්.ඩබ්ලිව්. ආර්.ඩී.බණ්ඩාරනායක මහතා එක්සත් ජාතික පක්ෂ රජයෙන් ඉවත් වී විරුද්ධ පක්ෂයට යාමේදී බණ්ඩාරනායක මහතා අනුගමනය කළ ප‍්‍රථමයා වූයේ ද ඩී.ඒ.රාජපක්ෂ මහතා ය. ඉන්පසුව ශී‍්‍ර ලංකා නිදහස් පක්ෂය බිහිවීමේ සිට එම පක්ෂය මැතිවරණවලින් ජය ලබාගෙන රාජ්‍ය බලය ලබාගැනීම දක්වා පක්ෂය වෙනුවෙන් සුවිශේෂී වැඩ කොටසක් කරන ලද දේශපාලඥයා වන්නේ ද ඩී.ඒ.රාජපක්ෂ මහතා ය. 1952 මහ මැතිවරණය සඳහා ශී‍්‍ර ලංකා නිදහස් පක්ෂය ප‍්‍රථමවරට මුහුණ දුන්නේ ය. එහිදී ජය ලබාගැනීමට හැකිවූයේ මන්තී‍්‍ර ආසන 9ක් පමණි. ඒ නව දෙනාට ඇතුළත්වීමට ඩී.ඒ.රාජපක්ෂ මහතාට ද හැකිවිය. 1956 සමාජ පෙරැළියත් සමඟ පැවැති මහ මැතිවරණයේදී ශී‍්‍ර ලංකා නිදහස් පක්ෂය ප‍්‍රමුඛ වාමාංශික පක්ෂ එකමුතුවට විශිෂ්ට ජයක් අත්වෙන විට ඩී.ඒ. රාජපක්ෂ මහතා ජයග‍්‍රහණය කෙළේ පහළොස්දහසකට වඩා වැඩි ඡන්ද ලබා ගනිමිණි. එය මුළු දකුණු පළාතේ ඉහළම වැඩි ඡන්ද ප‍්‍රමාණය වශයෙන් වාර්තා විය. බණ්ඩාරනායක මහතාගේ රජයේ ඉඩම් හා ඉඩම් සංවර්ධන උප ඇමැති ධූරය හිමිවන්නේ ඩී.ඒ.රාජපක්ෂ මහතාට ය. එහිදී මහජනතාව වෙනුවෙන් අති විශාල වැඩ කොටසක් කිරීමේ අවස්ථාවද ඒ මහතාට හිමිවන්නේ ය. ගොවිතැන් කිරීමට ඉඩම් හා ජලය නොමැති රුහුණේ ජනතාව වෙනුවෙන් අති විශාල මෙහෙවරක් කිරීම සඳහා ඩී.ඒ. රාජපක්ෂ මහතා තීන්දු තීරණ කිහිපයක් ම ගෙන නව වැඩසටහන් ආරම්භ කරන්නේ අහිංසක ගොවි ජනතාව වෙනුවෙනි. විශේෂයෙන්ම වළවේ ගඟ සංවර්ධනය යෝජනා ක‍්‍රමය කි‍්‍රයාත්මක කිරීමට මැදිහත් වීම ඩී.ඒ. රාජපක්ෂ මහතා කරන ලද සමාජ මෙහෙවරේ එක් සිද්ධියක් පමණි.
රුහුණේ ධාන්‍යාගාරය කාලයක් රුහුණ සුදු අධිරජ්‍යවාදීන් විසින් බැහැර කැර තිබුණේ අන්ත ශුෂ්ක කිසිම දෙයක් කිරීමට නොහැකි කලාපයක් වශයෙන් නම් කරමිනි. රජ දවස රුහුණ රට ධාන්‍යාගාරයක් පැවැති සශී‍්‍රක භූමියක් බව සුදු ජාතික මහත්වරුන් දැන නොසිටි අතර එම තොරතුරු දැන ගැනීමටද ඔවුන්ට කිසිදු අවශ්‍යතාවක්ද නොවීය. රජ දවසේ රුහුණට තිබුණු සශ‍්‍රීකත්වය යළි රුහුණට ගෙන එන්නේ කෙසේද යන්න ඩී.ඒ රාජපක්ෂ මහතා ඉතා හොදින් දැන සිටියේය. කුඩාගම් හා වැව් එකිනෙකට එක් කොට ජාල සටහනක් මුලින්ම සකස් කෙළේ ඩී.ඒ. රාජපක්ෂ මහතාය. හුලංදා ඔය , චන්ද්‍රිකා වැව වාරි සංවර්ධන ව්‍යාපාරය මෙන්ම කිරම ඔය , උඩු කිරිවිල ජලාශය ආශ‍්‍රිත වාරි යෝජනා සංවර්ධනය, තංගලු වේල්ල , බැරගම , අඟණකොළපැලැස්ස , යන කෘෂි හා වාරි යෝජනා ක‍්‍රම ඩී.ඒ. රාජපක්ෂ මහතා ලබා දුන්නේ රුහුණේ කෙත්වතු සරුකර රට ස්වයං පෝෂී ආර්ථිකයක් බවට පත් කිරීමටය. ප‍්‍රදේශය පුරා ජල ගබඩා හා සුළු වාරිමාර්ග ලෙස ගම් වැව් සංවර්ධනයෙන් ගොවිතැනට අවශ්‍ය ජල පෝෂක කලාප ඇති කිරීමටද ඩී.ඒ. රාජපක්ෂ මහතා පියවර ගත්තේය. කෘෂි කර්මාන්තයට වාරි කර්මාන්තයට පමණක් නොව සමුපකාරය නංවා වෙළෙද හුවමාරු ක‍්‍රමය ජනතාවාදී කිරීමට ඩී.ඒ.රාජපක්ෂ මහතා මැදිහත් වුයේ දේශීය රෙදි පිළි නිෂ්පාදනය රැක ගැනීමටය. ඒ සඳහා හම්බන්තොට දිස්ති‍්‍රක්කයේ කපු වගාව ව්‍යාප්ත කිරීමටද ඩී.ඒ. රාජපක්ෂ මහතා කි‍්‍රයා කෙළේය. පාරම්පරික කර්මාන්තකරුවන්ගේ ගැටලු සොයා බලා ඔවුන් නඟා සිටුවීම සඳහාද ඩී.ඒ.රාජපක්ෂ මහතා සුවිශේෂී වූ කාර්යයභාරයක් කෙළේය. රන්, රිදී, කැටයම් , ලී බඩු වැඩ , මැටි , ප‍්‍රතිමා නෙළීමේ කලාව ඇතුළු ගෘහ කර්මාන්ත ප‍්‍රදේශය පුරා ව්‍යාප්ත කිරීමට අවශ්‍ය මග පෙන්නුවේද ඩී.ඒ. රාජපක්ෂ මහතාය. මීට අමතරව ගමනාගමනය, මංමාවත් , පානීය ජලය, ජල විදුලිය වැනි අත්‍යවශ්‍ය යටිතල පහසුකම් රුහුණේ ජනතාවට ලබා දීමට කටයුතු කෙළේද ඩී.ඒ. රාජපක්ෂ මහතාය. අදත් රුහුණේ ජනතාව රජවරුන්ට කෘතගුණ සලකන්නේ මේ නිසාය.
පංච මහා බලවේගය සඟ, වෙඳ, ගුරු, ගොවි , කම්කරු පංච මහා බලවේග 1956 කරන ලද පෙරැළිය වඩාත්ම සාර්ථක අන්දමින් ගමට ගෙන ගිය දේශපාලනඥයා වන්නේද ඩී.ඒ. රාජපක්ෂ මහතාය. එදා ඩී.ඒ.රාජපක්ෂ මහතා ඇතුළු රාජපක්ෂ පරපුර රුහුණට , පොදුවේ රටට කළ සේවය ගැන අමුතුවෙන් කිය යුතු නොවේ. එදත් අදත් හෙටත් ජනතාව රාජපක්ෂවරුන්ට ආදරය කරන්නේ එම නිසාය. ඩී.ඒ. රාජපක්ෂ මහතාගේ 104 වැනි ජන්ම දිනය සැමැරෙන මේ කාලයේ ඒ වෙනුවෙන් කෘෂිකර්ම, වාරිකර්මාන්ත, සංස්කෘතික කටයුතුª ඇතුළු අංග රැසක් සබරගමුව පළාත හා හම්බන්තොට දිස්ත‍්‍රික්කය කේන්ද්‍ර කරගනිමින් සිදුවේ. එදා ජනතාව වෙනුවෙන් කරන ලද අපිරිමිත සේවයට අදත් ජනතාව ඩී.ඒ. රාජපක්ෂ මහතාට ණය ගැතිය. ඒ ණය තවදුරටත් වැඩි වෙමින් පවතින්නේ ඩී.ඒ. රාජපක්ෂ මහතා රටට දායාද කළ ජනාධිපති මහින්ද රාජපක්ෂ මහතා ඇතුළු පුත‍්‍ර රත්නයන් මේ රටට හා ජනතාවට කළ හැකි ඉහළම සේවය වර්තමානයේදී සිදුකරමින් සිටින නිසාය.
|
| |
|||||||||||||||||||||||||||||||||||||
|
රට දිනවන්න කැපවුණු
රාජපක්ෂලා
රාජපක්ෂවරුන් හා රුහුණු රට අතර පවතින සම්බන්ධතාව සමාන කළ හැක්කේ මව හා දරුවා
පෙකණිවැලෙන් සම්බන්ධ වන ආකාරයටය. ඒ තරමටම රාජපක්ෂවරුන් හා රුහුණු රට අතර
සම්බන්ධයක් තිබේ. ශී‍්‍ර ලංකාවේ ඈත අතීතයේ සිටම යම් යම් පරපුරු රට පාලනයට සම්බන්ධ
වී කරන ලද වැඩ කොටස්වල බොහෝ සුවිශේෂීකම් තිබේ.
කර්තෘට ලියන්න
මුද්‍රණය සඳහා
