ශ්‍රී ලංකාවේ ත්‍රස්තවාදය පැරැදවීම ඓතිහාසිකයි
ශ්‍රී ලංකාවේ ත්‍රස්තවාදය
පැරැදවීම ඓතිහාසිකයි
‘ත්‍රස්තවාදය පරාජය කිරීමේ අත්දැකීම්’ සමුළුවේ දී ගෝඨාභය කියයි
* වසර 30ක් ත්‍රස්තවාදය ක්‍රියාත්මක වුණා
*
ජනාධිපතිවරයකු ඝාතනය කළා
* හාමුදුරුවරු-ප්‍රභූවරු මරා දැම්මා
*
ජනාධිපතිවරු 4ක් යුද්ධ කළා
* සාම සාකච්ඡා විටින් විට පැවැත්වුවා
භක්ති ධර්මප්‍රිය මෙන්ඩිස්
 මානුෂීය මෙහෙයුමක් සිදු කරමින් ත්‍රස්තවාදය පරාකළ ලෝකයේ පළමු රට ශ්‍රී
ලංකාව බව ආරක්ෂක ලේකම් ගෝඨාභය රාජපක්ෂ මහතා පවසයි. ශ්‍රී ලංකාව ත්‍රස්තවාදය පරාජයට
පත් කිරීම ඓතිහාසික සිද්ධියක් බව ආරක්ෂක ලේකම්වරයා හඳුන්වයි.‘වසර තිහකට අධික කාලයක්
ත්‍රස්තවාදය පැවතුණා. ජනාධිපතිවරුන් සිව් දෙනෙක් ත්‍රස්තවාදය විනාශ කිරීමට උත්සාහ
ගත්තා. එල්. ටී. ටී. ඊ. ය සමග සාකච්ඡා කළා. සාම සාකච්ඡා වලට ගියා. එහෙත් ඒ කිසිවක්
සාර්ථක නොවූ බව, රාජපක්ෂ මහතා අවධාරණය කළේය.
ත්‍රස්තවාදය පරාජය කිරීමේ ශ්‍රී ලංකාවේ අත්දැකීම් ලෝකයට බෙදා දීමට කොළඹ දී
පැවැත්වෙන ජාත්‍යන්තර සමුළුව අමතමින් ආරක්ෂක ලේකම්වරයා එම අදහස් පළ කළේය. කොළඹ
ගලධාරී හෝටලයේදී ආරම්භ වූ මෙම සමුළුව දින දෙකක් පැවැත්වේ. ජපානය, චීනය, රුසියාව,
එංගලන්තය ඇතුªළු ලෝකයේ ප්‍රබල රටවල් 42 ක ආරක්ෂක අංශ නියෝජිතයෝ මෙම සමුළුවට සහභාගී
වී සිටිති.
ඒ රටවල හමුදාවල කර්නල් නිලයේ සිට හමුදාපති දක්වා තනතුරුවල වූ හමුදා නිලධාරීහුද
ආරක්ෂක ප්‍රධානීහුද මෙයට සහභාගී වී සිටිති.
මෙහිදී ආරම්භක දේශනය කළ ආරක්ෂක ලේකම් ගෝඨාභය රාජපක්ෂ මහතා එල්. ටී. ටී. ඊ. ය ගත වූ
වසර තිහ තුළ ශ්‍රී ලංකාවේ සිදු කළ ඝාතන සිද්ධීන් රැසක් පිළිබඳ තොරතුරු හෙළි කළේය.
එල්. ටී. ටී. ඊ. ය මෙරට එක් ජනාධිපතිවරයෙකු ඝාතනය කළා. කොටින්ට විරුද්ධ වූ දෙමළ
නායකයන්, ඇමැතිවරුන්, ප්‍රභූවරුන්, බුද්ධිමතුන් සහ සාමාන්‍ය ජනතාවද ඝාතනය කළ බව
රාජපක්ෂ මහතා කීය.
කොටි ත්‍රස්තවාදීන් මෙරට කුඩා දරුවන්, ගැබිනි මවුවරුන්, සිවිල් වැසියන්, භික්ෂූන්
වහන්සේලා ඇතුළු ආගමික නායකයන් සහ ප්‍රභූවරුන් ඝාතනය කළ බවත් ශ්‍රී ලංකාවේ වැදගත්
ස්ථානවලට මරාගෙන මැරෙන ප්‍රහාර එල්ල කළ බවත් ප්‍රකාශ කළේය.
කටුනායක ජාත්‍යන්තර ගුවන් තොටුපොළට ප්‍රහාර එල්ල කළා. එමෙන්ම රටේ ආර්ථික මර්මස්ථාන
විනාශ කළා. ලෝකයේ දරුණුතම ත්‍රස්තවාදීන් බවට පත් වෙමින් ගුවන්, නාවුක, පාබල හමුදා
පවත්වාගෙන ගිය එකම ත්‍රස්තවාදී කණ්ඩායම බවට එල්. ටී. ටී. ඊ. ය පත්වූ බවට ද ආරක්ෂක
ලේකම්වරයා පැවැසුවේය.
ආරක්ෂක ලේකම්වරයා මෙසේද කීය. 2006 දී මාවිල්ආරු සොරොව්ව වසා දමමින් ගොවීන්ට ජලය
සැපයීම නතර කළා. එදා ජනාධිපති මහින්ද රාජපක්ෂ මහතා නැගෙනහිර මානුෂීය මෙහෙයුම
ඇරඹුවා. ඉතා කෙටි කලකදී අපි මානුෂීය මෙහෙයුම ජය ගත්තා. උතුරේත් මානුෂීය මෙහෙයුම
දියත් කොට ජය ගත්තා.
අපේ ත්‍රිවිධ හමුදාව විශේෂ කැපකිරීම් සිදු කරමින් මානුෂීය
මෙහෙයුම ක්‍රියාත්මක වෙද්දී ජාත්‍යන්තර ප්‍රජාව හරහා දෙමළ ඩයස්පෝරාව එම මෙහෙයුම
නවත්වාලීමට කටයුතු කළා. එහෙත් මේ සියල්ල ජයග්‍රහණය කළා.
ජනාධිපති මහින්ද රාජපක්ෂ මහතාගේ නිවැරදි දේශපාලන නායකත්වය ගැන ත්‍රිවිධ හමුදාව
විශ්වාසය තැබුවා. එපමණක් නොව කොටි ග්‍රහණයේ සිටි දෙමළ වැසියන් ද ජනාධිපතිවරයා
පිළිබඳ විශ්වාසය තැබුවා. අද ජාත්‍යන්තරව ත්‍රස්තවාදය ක්‍රියාත්මක වෙනවා. අප සියලු
දෙනා එක්ව එය පරාජය කළ යුතුයි.
ත්‍රස්තවාදයේ කුරිරු අත්දැකීම් ශ්‍රී ලංකාව සතු බව කී ආරක්ෂක ලේකම්වරයා ලෝකයේ කිසිම
රටක් ත්‍රස්තවාදයට ගොදුරු නොවේවායි ප්‍රාර්ථනා කළේය.
.
| 
කර්තෘට ලියන්න
මුද්‍රණය සඳහා
