‘පාපන්දු පොඩීට’ ලොකු කැපිල්ලක්
‘පාපන්දු පොඩීට’
ලොකු කැපිල්ලක්
පි‍්‍රන්ස් ගුණසේකර
ශ්‍රී ලංකා පාපන්දු පිලට වසර 5ක් ක්‍රීඩා කළ මැද පෙළ ක්‍රීඩක චතුර ගුණරත්න ජාතික
පාපන්දු සංචිතයෙන් ඉවත් කර ඇත.
ශ්‍රී ලංකා පාපන්දු පිලේ උපනායකයා ලෙස කටයුතු කළ චතුර ගුණරත්න ජාතික පාපන්දු
සංචිතයෙන් ඉවත් කිරීම පිළිබඳව ඔහුට කිසිදු හේතුවක් දන්වා නොමැති වීමද විශේෂත්වයකි.
පාපන්දු ක්‍රීඩා ලෝලීන් හා ක්‍රීඩකයන් අතර ‘පොඩී’ ලෙස හැඳින්වෙන චතුර ගුණරත්න ශ්‍රී
ලංකා ජාතික පාපන්දු සංචිතයෙන් ඉවත් කිරීම පසුපස ප්‍රබල කුමන්ත්‍රණයක් ඇතැයිද වාර්තා
වේ.
 පසුගිය කාලයේදී ශ්‍රී ලංකා පාපන්දු ක්‍රීඩකයන් කිහිප දෙනෙකු මුදලට තරග පාවාදීමේ
චෝදනා මත තරග තහනමකට ලක් වූ අතර එම සිද්ධිය හෙළි කරන ලද්දේ චතුර ගුණරත්න විසිනි.
සිංගප්පූරු ජාතික සූදු අන්තුවෙකුගේ යෝජනාවක් මත පාපන්දු තරග කිහිපයක් පරාජය කරන ලෙස
කළ ඉල්ලීම ප්‍රතික්ෂේප කරමින් එයට අදාළ සියලු තොරතුරු ජංගම දුරකථනය මගින් පටිගත
කරගෙන ශ්‍රී ලංකා පාපන්දු සම්මේලනයට ලබා දීමට චතුර ගුණරත්න ක්‍රියා කර තිබුණි.
මහත් ආන්දෝලනයකට තුඩුදුන් මේ සිද්ධියේ තොරතුරු හෙළි කිරීමෙන් උරණ වූ පිරිසක් චතුර
ගුණරත්නගේ පාපන්දු ජීවිතය විනාශ කිරීමට වෙරදරමින් සිටින බව වාර්තා වේ.
චතුර ගුණරත්න අවසන් වරට ශ්‍රී ලංකාව නියෝජනය කරමින් කොළඹදී පැවැති ආසියානු පාපන්දු
සම්මේලන කුසලාන තරගාවලියේදී බංග්ලාදේශයට එරෙහිව ගෝල් වාර්තා කළේ ය. මේ වසරේ නිමා වූ
චැම්පියන් ලීග් පාපන්දු තරගාවලියේදී මීගමුව දොන් බොස්කෝ පිල වෙනුවෙන් ගෝල් 16ක් ලබා
ගැනීමද කැපී පෙනෙන දක්ෂතාවකි. එම තරගාවලියේ වැඩිම දෙවැනි ගෝල් ලාභී ක්‍රීඩකයා ද ඔහු
විය.
මාතර සර්වේසස් විදුහලෙන් ක්‍රීඩාවට පිවිසි චතුර ගුණරත්න 28 වැනි වියෙහි පසුවෙයි.
මෙවැනි දක්ෂ ක්‍රීඩකයෙකුට ලැබිය යුතු අවස්ථාව අහිමි කරන්නේ ශ්‍රී ලංකා පාපන්දු
ක්‍ෂේත්‍රයේ ඇති කුමන බලපෑමකින්ද යන්න ප්‍රශ්නයකි.
ශ්‍රී ලංකා ජාතික පාපන්දු පිල ලබන මාර්තු 8 දා සිට 11 දා දක්වා එක්සත් අරාබි එමීර්
රාජ්‍යයේදී මේ වසරේ ප්‍රථම ජාත්‍යන්තර පාපන්දු තරගාවලියට සහභාගීවීමට නියමිතය.
අනතුරුව මාර්තු 27 දා නේපාලයේ පැවැත්වෙන ආසියානු පාපන්දු සංගම් අභියෝග කුසලාන
තරගාවලියට ද සහභාගීවේ.
.
| 
කර්තෘට ලියන්න
මුද්‍රණය සඳහා
